Hafnarfjallsrall - njóta en ekki þjóta

Hafnarfjallsrall - njóta en ekki þjóta:

Gengið upp vesturhlíðar Tungukolls og fjallakollar Hafnarfjalls heimsóttir frá austri til vesturs á Hafnarfjallsöxlina - tindurinn Hróar er þó ekki með, enda illgengt á hann frá Katlahrygg. Hér eru væntanlega taldir fleiri tindar en skv hefð er yfirleitt talað um sjö. Vegna vinds var sleppt að fara upp á Hnjúkinn austan Gildalhnjúks, sem margir nefna Katlaþúfu, aðrir Þverfell, en ég hallast að merkingu Ara Trausta Guðmundssonar, sem nefnir þennan Þverfell en tindinn sem tengist Katlahrygg ofan við Katla undir Hróari Katlaþúfu, en hann sést ekki frá Borgarnesi eða þjóðvegi nr 1. Milli Klausturtunguhóls og Hafnarfjallsaxlar væru þá Þverfell, sem næst hæsti kollur þá Gildalshnjúkur hæstur og að endingu Hafnarfjall (ofan við Flyðrur)

Greinilegt er að grunn hæðarmælingar eru ekki réttar í símanum miðað við landakort þar sem Gildalshnjúkur er sagður 844 m.y.s - ég fór þar upp en síminn mældi hæst 823 metra, því má bæta 20 metrum við mínar mælingar, þannig verða bæði Tungukollur og Gildalshnjúkur rétt mældir.

Í þessari ferð var leitast við að njóta þess að vera á fjöllum, fara í sólbað í skjóli, skoða steina og mynda plöntur og ljósmynda einnig annað, sem fyrir augu bar. Sjálf er ég nú komin af léttasta skeiði, verandi löggilt gamalmenni, ef ekki hefði verið eins hlýtt og notalegt í skjóli í undan sterkum norð-austan vindum, sem báru með sér moldrok og takmarkað útsýni býst ég við að átta tímar hefðu verið hæfilegur fyrir mig, en tími minn var mun lengri vegna eigin snölturs og snúninga og þess að njóta þess að vera á fjallinu.
Ferðafélagi minn, hún Jónína Hólmfríður Pálsdóttir á allan heiður að því að hafa "talað mig upp" Tungukollinn, ein hefði ég aldrei fetað þá götu.